പ്രവാസി / അബ്ദുൽ ലത്തീഫ് സീക്കോ

ഇവിടെ നിലാവുദിക്കാൻ
കാതങ്ങൾക്കപ്പുറത്ത്
കാണാക്കയങ്ങളിൽ ഒരു-
സൂര്യൻ കത്തിജ്വലിക്കണം.

ഇവിടെ കിനാവുണരാൻ
കനൽ പഥങ്ങൾ കടന്ന്
പകലാറുവോളം
വെയിലെരിയണം

ഇവിടെ വെളിച്ചം പരക്കുവാൻ
മെഴുകുതിരി പോൽ-
സ്വയം ഉരുകുമ്പോഴും
കെടാതിരിക്കണം.

പാളിപ്പോയ തന്ത്രം / മറിയം റസാന-ബുഖാരി സ്കൂൾ കൊണ്ടോട്ടി

പണ്ട് പണ്ട് കാട്ടിൽ ഒരു കുറുക്കൻ ഉണ്ടായിരുന്നു. ഒരു ദിവസം കുറുക്കൻ തീറ്റ തേടി കാട്ടിലൂടെ നടക്കുകയായിരുന്നു. അബദ്ധത്തിൽ കുറുക്കന്റെ വാൽ ഒരു കെണിയിൽ കുടുങ്ങി. കുറുക്കൻ വാൽ വലിച്ചെടുക്കാൻ ശ്രമിച്ചു. പക്ഷെ തന്റെ വാൽ മുറിഞ്ഞു പോകുകയാണുണ്ടായത്. കുറുക്കന് വലിയ സങ്കടമായി. ഞാൻ ഇനി എങ്ങനെ എന്റെ കൂട്ടുകാരുടെ അടുത്ത് പോകും? കുറുക്കൻ ദു:ഖത്തോടെ ആലോചിച്ചു. അപ്പോൾ കുറുക്കന്റെ മനസ്സിൽ ഒരു ഉപായമുദിച്ചു. കുറുക്കൻ തന്റെ കൂട്ടുകാരുടെ അടുത്ത് ചെന്നിട്ട് പറഞ്ഞു. എല്ലാവരും നോക്കൂ ഞാൻ എന്റെ വാൽ മുറിച്ചു കളഞ്ഞത് കണ്ടില്ലേ..! നിങ്ങളും ചെയ്ത് നോക്കൂ. ഈ വാലു കൊണ്ട് ഒരു പ്രയോജനവും ഇല്ല. നിങ്ങളും ഇത് പോലെ ചെയ്തു നോക്കൂ. നല്ല സുഖമായിരിക്കും. അത് കേട്ട് മറ്റു കുറുക്കന്മാർ ആർത്തു ചിരിച്ചു. നിനക്ക് പരിയ അമളി മറച്ചു വെക്കാൻ ഉള്ള തന്ത്രം . പക്ഷെ ഞങ്ങൾ മണ്ടന്മാരല്ല്ല. കുറുക്കൻ നാണിച്ചു തല താഴ്ത്തി ഓടി.

ഞാൻ തൊട്ടറിഞ്ഞ മാസം / ബാബു അൽ ബാദിയ

ആത്മാവിനേയും ശരീരത്തേയും ശുദ്ധീകരിക്കുകയും മറ്റുള്ളവരുടെ വിശപ്പ് തന്റേത് കൂടിയാണെന്ന് അറിയുകയും ചെയ്യുന്ന മാസമാണ് റമദാൻ. പരിശുദ്ധ ഖുർ ആൻ ഭൂമിയിലേക്ക് ഇറക്കി മനുഷ്യർക്ക് നല്കിയ ഏറ്റവും വലിയ വരദാനമാണ് റമളാൻ. അത് പോലെ സക്കാത്തും നിസ്കാരവും ഇസ് ലാം വിശ്വാസത്തിന്റെ പഞ്ചസ്തംഭങ്ങളിൽ നിഷ്കർഷിതമാണ്. ദാനം ധനത്തെ ക്ഷയിപ്പിക്കുകയല്ല മറിച്ച്, ഉള്ളവൻ ഇല്ലാത്തവന്  നല്കുമ്പോഴുണ്ടാകുന്ന് കുളിർമയാണ് ഈ മാസം നമ്മെ ഓർമ്മപ്പെടുത്തുന്നത്.
ഭൗതിക സുഖങ്ങൾ മാറ്റിവെച്ച് ലോകത്തെമ്പാടുമുള്ള സത്യവിശ്വാസികൾ ധർമ്മവും ദാനവും നിർവ്വഹിച്ചു പ്രാർത്ഥനാ നിർഭരമായ ഇത്രയും നല്ല മാസം നമ്മുടെ മുന്നിൽ. ഗുണങ്ങളേറെ തൊട്ടറിഞ്ഞ ഈ വിശിഷ്ട മാസം വിട പറയാതെ നിന്നിരുന്നെങ്കിൽ എന്നു ഞാനാശിച്ചു പോകുന്നു.

പ്രവാസം / ലുഖ്മാൻ വിളത്തൂർ

അചിരാകാശത്തിന്റെ അകുടകോണിൽ
കല്ലിച്ച സ്വപ്നങ്ങളും മെല്ലിച്ച്‌ ജീവിതവും
ചാലിച്ച്‌ അകുസുമിതാഗ്രഹങ്ങളാൽ
വാർന്നു വാർന്നു പാർക്കുന്നവൻ.!

അതികൃതാദ്ധ്വാനത്തിന്റെ ചക്രരാത്രങ്ങളിൽ
കൂട്ടിക്കിഴിച്ച യൗവ്വനവും കണ്ട കിനാക്കളും
തോന്നിച്ച
അക്രീതാനിഭവങ്ങളാൽ
പേർത്തും പേർത്തും ഉരുകുന്നവൻ.! 

അപവർത്തമാനത്തിന്റെ പെരുത്ത ചിത്രങ്ങളിൽ
അകം പൊള്ളിച്ച തേങ്ങലും
ക്ലാവു പിടിച്ച ഓർമ്മകളും
നിറച്ച്‌
കടുത്ത അതിമാനങ്ങളാൽ
വീ ർത്തു വീ ർത്തു പൊട്ടുന്നവൻ.! 

അലകേട്ടോടിപ്പോന്നയെന്റെ
അടർന്ന ഇന്നലെകളിൽ
കൊരുത്ത പ്രതീക്ഷയും
കവർന്ന നൽനാളുകളും
സഹിച്ച്
അഗതവാനിന്റെ മഴക്കാറുകൾക്കായ്
അർപ്പിച്ചുറച്ചു തേടുന്നവൻ.!

സൃഷ്ടികൾ ക്ഷണിക്കുന്നു

തളിർ ഇ-മാഗസിനിലേക്ക്‌ ലേഖനം, കഥ, കവിത, കത്തികൾ തുടങ്ങി നിങ്ങളെടെ എല്ലാ സർഗ സൃഷ്ടികളും ക്ഷണിക്കുന്നു. ഒപ്പം നിങ്ങളുടെ വിലയേറിയ അഭിപ്രായങ്ങളും നിർദ്ദേശങ്ങളും അയക്കുക..!
ഇമെയിൽ:
rscdmmculturalcouncil@gmail.com

വിട /

 

പുണ്യമാസമേ
നീ വിട പറയുന്നുവോ
ഇനി നീ വരുമ്പോഴെൻ
ഉയിരുണ്ടാകുമോയീ ഉലകിൽ
നിന്നെ സാക്ഷിയാക്കി നാഥനിൽ
സമർപ്പിച്ച പാപഭാരക്കെട്ടുകൾ
നിൻ പകലുകളിൽ ആമാശയത്തിന്രെ
ആശകളകറ്റിയും
ഇരവുകൾ കണ്ണീരൊലിപ്പിച്ച
നിൻ ദിനരാത്രങ്ങൾ
റഹ് മത്തും, മഗ്ഫിറത്തും, ഒടുവിൽ ഇത്ഖും
രണഭൂവിൽ സത്യം ജയിപ്പിച്ച ബദ് റും
അതിഥിയായെത്തിയ നീയിന്നലെ
ഇന്നിതാ പടിയിറങ്ങുന്നു.
തന്നില്ല ഞാനൊന്നുമെന്നാലും
വരണമിനിയുമൊരുപാട് വട്ടമെൻ
ആശ തീരു വോളം

മാണിക്യം / അബൂ തബ്ശീകർ-ദമ്മാം

ചുറ്റും കണ്ണഞ്ചിപ്പിക്കുന്ന പ്രകാശം. അലാവിദ്ദീൻ കഥകളിലെ തിളങ്ങുന്ന കല്ലുകൾ നിറഞ്ഞ താഴ്വാരം. കാഴ്ചകൾ കണ്ടദ്ദേഹം മുന്നോട്ട് നടന്നു. ദൂരെ കുന്നിൻ മുകളിലുള്ള വഴികളിൽ ധാരാളം യാത്രക്കാർ ഒറ്റക്കും കൂട്ടമായും നീങ്ങുന്നുണ്ട്. ചെറുതും വലുതുമായ കല്ലുകളും മുത്തുകളും അമൂല്യങ്ങളാണെന്ന് പറഞ്ഞ് കേട്ടിട്ടുണ്ട്. എല്ലാവരും സ്വന്തം കുട്ടകളിൽ നല്ല കല്ല് നോക്കി പെറുക്കിയിടുന്നുണ്ട്. എനിക്കും ഒരു കുട്ട നിറച്ച് കൊണ്ടു പോകണം. നാട്ടിലെത്തിയാൽ പിന്നെ അദ്ധ്വാനിക്കാതെ കഴിയാമല്ലോ. അദ്ദേഹം മനസ്സിൽ കരുതി. സാരമില്ല. ഇനിയും സമയമുണ്ടല്ലോ. കുന്നിൻ മുകളിലേക്ക് നോക്കി പറഞ്ഞ് കൊണ്ടദ്ദേഹം നടന്നു. നയനാന്ദകരമായ കാഴ്ചകൾ കണ്ട് നീങ്ങവെ അയാൾ പെട്ടെന്ന് കുന്നിൻ മുകളിലെത്തി. ‘അതെന്താ ഒറ്റക്കല്ല് പോലും ഇവിടെയില്ലല്ലോ.!’ എല്ലാവരുടെ തലയിലും നിറഞ്ഞ കുട്ടകൾ നോക്കിയദ്ദേഹം അസൂയ പൂണ്ടു. താഴ്വാരത്ത് നിറയെ രത്നങ്ങളുണ്ടായിരുന്നല്ലോ. തിരിച്ചോടാൻ വേണ്ടി രണ്ടടി വെച്ചതും ഒരു ഭയങ്കര സർപ്പം മുന്നിലേക്ക് വീണതും ഒരുമിച്ച്.
അല്ലാഹ്...അലറിക്കൊണ്ടദ്ദേഹം ചുറ്റും തപ്പിനോക്കി. റൂമിൽ വിയർത്തു കുളിച്ച് ഞെട്ടിയുണർന്നപ്പോൾ സ്ഥലകാല ബോധമില്ല. ഞാൻ കണ്ട സ്വപനമായിരുന്നു മനസ്സ് മുഴുവനും. ഇന്നലത്തെ തർബിയ ക്ലാസ്സിലെ ഉസ്താദിന്റെ വാക്കുകൾ മനസ്സിലേക്ക് വന്നു. റമദാനിലെ സല്ക്കർമ്മങ്ങൾ അമൂല്യമാണ്. അത് പരലോകത്ത് ധാരാളം മടങ്ങ പ്രതിഫലത്തിനു കാരണമാകും. തന്റെ കൂട്ടുകാർ ധാരാളം സല്ക്കർമ്മങ്ങൾ കൊണ്ടു റമദാനിനെ വരവേറ്റു. പക്ഷെ റമളാനിലെ ഇത്രയും നാളുകൾ ഞാൻ പാഴാക്കിയല്ലോ..! കരഞ്ഞ് കൊണ്ട് വുളൂ ചെയ്ത് ഖുർ ആനിന്റെ  പേജുകൾ മറിച്ച് ഓതാൻ തുടങ്ങി.

ഫലിതം / അബൂ തബ്ശീർ-ദമ്മാം

ബസ്റ്റാന്റിൽ ബസ്സ് കാത്തിരിക്കുന്ന വിക്കുള്ള ഒരാൾ അപരിചിതനോട് ‘ കി..കി..കി....കിഴക്കോട്ട് എപ്പോഴാണ് ബസ്സ്’ അപരിചിതൻ അയാളുടെ മുഖത്തെക്ക് നോക്കി, അല്പം ഗൗരവത്തിലാണ്; ഒന്നും മിണ്ടിയില്ല. ചോദിച്ചയാൾക്ക് കലികയറി. ഒന്നു കൂടെ ഉച്ചത്തിൽ വീണ്ടും., ‘ നി..നി..നി.. നിനക്ക് നാ..നാ..നാ..നാവില്ലേ? അപ്പോഴും അയാൾ മൗനം വെളിഞ്ഞതേയില്ല. ഇത് കണ്ടു നിന്ന മറ്റൊരാൾ ചോദിച്ചു, ’നിങ്ങളെന്താ ഒന്നും പറയാതിരുന്നത്?‘ അറിയില്ലെങ്കിൽ അറിയില്ലെന്നു പറഞ്ഞാൽ പോരെ?’ എ..എ..എ..എന്നിട്ട് വേണം എ....എ...എ..എനിക്ക് അ..അ..അ..അടി കി..കി...കി...കിട്ടുന്നത് കാ..ക....ക്...കാണാൻ അ..അ....അ..അല്ലേ?

ശിഥിലമാകുന്ന ബന്ധങ്ങൾ / സ്വാദിഖ് സഖാഫി അൽ ജഫനി

ബന്ധങ്ങൾക്ക് ഇസ് ലാം നല്കിയ പ്രാധാന്യം ചെറുതല്ല. ബന്ധങ്ങളെ മൂന്നായി തരം തിരിക്കാം. കുടുംബ ബന്ധം, അയൽ ബന്ധം, കൂട്ടു ബന്ധം. മൂന്നിലെയും അറ്റു പോകുന്ന കണ്ണികളെ ബന്ധിപ്പിക്കാൻ ഇസ് ലാം ബന്ധശ്രദ്ധ പുലർത്തുനത് കാണാം. ഇതര ജീവികളിൽ നിന്ന് വ്യത്യസ്ഥമായി മനുഷ്യ ബന്ധങ്ങൾ വ്യക്തി ജീവിതത്തിന് അനിവാര്യമാണ്. ബലഹീനനായ മനുഷ്യൻ പരസ്പരം കടിച്ചു കീറുന്നത് ക്ഷന്ത്യവ്യമല്ല.
മാതാപിതാക്കൾ മക്കളോടും തിരിച്ചും എങ്ങനെ പെരുമാറണം , ഭാര്യ ഭർത്താവിനോടും തിരിച്ചും, അയൽ വാസി പരസ്പരവും കൂട്ടുകാരൻ അവരോടും എങ്ങനെ പെരുമാറണമെന്നതിൽ ഇസ് ലാമിനു വ്യക്തമായ കാഴ്ചപ്പാടുണ്ട്. നിസ്കാരവും നോമ്പും മാത്രമല്ല ചർച്ചാ വിഷയം. ബന്ധങ്ങളെ മുറിക്കുന്നവരെ ഏറ്റവും വലിയ പരാജിചതരായിട്ടാണ് അല്ലാഹു പറയുന്നത്.
കുടുംബ ബന്ധം മഹത്തായ ഒരു അനുഗ്രഹമാണ്. ഈ ബന്ധം ഇല്ലായിരുന്നുവെങ്കിൽ ഈ ലോകത്ത് ഇന്ന് കാണുന്ന തരത്തിലെ പാരസ്പര്യം പ്രതീക്ഷിക്കാനാവില്ല.മനുഷ്യൻ എന്തിനു കഷ്ടപ്പെടുന്നു? അവന്റെ ഒരു ചാൺ വയറിനു മാത്രം.! അങ്ങനെയല്ലല്ലോ. അവൻ അദ്ധ്വാനിക്കും അവന്റെ കുടുംബ ബന്ധം പുലർത്താനാണ്. ഭൂമിയിൽ എന്തെല്ലാം മാറ്റങ്ങളും കണ്ടുപിടിത്തങ്ങളും നടക്കുന്നു, . കുടുംബ സംവിധാനമില്ലാത്ത ലോകത്തിനു വേണ്ടി ഒരു പരീക്ഷണവും കാണുന്നില്ല.
വ്യവസ്ഥാപിത കുടുംബമില്ലാതെ ഒരു കൂട്ടം മനിഷ്യരെ പടച്ചു വിടാൻ അല്ലാഹുവിനു കഴിയില്ലായിരുന്നോ? തീ ർച്ചയായും സാധിക്കും. പിന്നെ എന്തിന് മാതാവ്. പിതാവ്, ഭാര്യ, മക്കൾ, എന്നിങ്ങനെയുള്ള രൂപത്തിൽ സൃഷ്ടിച്ചു.? അവിടെയാണ് കുടുംബ ബന്ധത്തിന്റെ പ്രസക്തി.

വമ്പ് / ഷാഹിദ് ശമീം വിളയിൽ

സ്കൂളിൽ മാഷിന്റെ കയ്യിൽ
നീളമുള്ള കമ്പ്
സ്കൂൾ വിട്ട് പൊരുന്നേരം
റോട്ടിലൊരു ഹമ്പ്
റോഡ് വിട്ട് കേറി വഴിയിൽ
പന്ത് പോലൊരു ബോംബ്
വാർത്ത കേട്ടു വന്നു പോലീസ്
കിട്ടിയില്ലൊരു തുമ്പ്
ഓടി വീട്ടിലേക്ക് ഞാനും
എല്ലാരെയും മുമ്പ്
ഉമ്മ വാരിത്തന്നെനിക്ക്
ഊണുമൊപ്പം ചേമ്പ്
ഊണു തിന്നുറങ്ങി ഞാനും
കണ്ടു വമ്പൻ പാമ്പ്
പാമ്പിനെ പിടിക്കുമെന്ന്
ചൊല്ലി ഞാനും വീമ്പ്